Словенија е мала европска земја препознатлива по изобилство на природни убавини, чиста животна околина, квалитетен животен стандард и богата културна традиција.

Со географска местоположба меѓу Алпите и Јадранското море, Словенија се граничи со четири земји: Италија, Австрија, Унгарија и Хрватска.

Број на жители: 2 080 908.

Официјален јазик е словенечкиот, а италијанскиот и унгарскиот јазик се употребуваат во краевите каде живеат италијанско и унгарско малцинство.

Словенија е полноправна членка на ЕУ и НАТО од 2004 година.

Од 2007 година државна валута е еврото

Словенија е потписник на Болоњската декларација и стреми кон спроведување на темелните цели за терцијалното  образование: квалитет, вработливост и мобилност во Европа и светот, фер пристап, разноликост на институции и студиски програми.

Високото образование во Словенија ги опфаќа Вишите школи и Универзитетите.
Виши школи: 30 државни и 19 приватни (33 програми).

Високошколски установи: 6 државни универзитети (594 додипломски, 500 магистерски студиски програми) и 40 приватни факултети (110 додипломски и 69 магистерски програми).

Сите студиски програми се акредитирани од Министерството за образование, наука и спорт на Република Словенија.

Со квалитетен образовен систем, меѓународно признаени дипломи и широк избор за научни истражувања, Словенија ќе ви овозможи перспективен професионален развој и ќе ве научи животни лекции надвор од рамките на наставните програми.

Без разлика која студиска програма ќе ја изберете, бидете сигурни дека сте добредојдени во пријателска академска заедница и земја со извонредно организиран систем за поддршка на студентите.

1.Бесплатно студирање

За македонските државјани, студирањето на сите државни Виши школи и Универзитети во Словенија е бесплатно, врз основа на билатералниот договор помеѓу двете земји.

Право на бесплатни студии имаат и државјаните од другите екс ЈУ земји: Србија, Бих и Црна Гора, како и сите државјани на ЕУ.

2. Меѓународно признаени дипломи и академска одличност

Студиските програми во Словенија обезбедуваат современ академски, интерактивен и иновативен пристап. Наставата е фокусирана на истражување и пракса, а факултетите се опремени со најсовремени технологии и лаборатории. Вашето стручно надградување ќе биде поддржано од врвни професори експерти во својата област. Стекнатите дипломи на словенечките универзитети се меѓународно признаени и претставуваат знак за квалитет и академска одличност.

3. Уписи без приемни испити

За упис на словенечките високообразовни институции нема приемни испити, освен на академиите за уметност, музика и спорт, како и на факултетот за архитектура.

4. Безбедна и мирна

Словенија постојано е рангирана како една од најбезбедните нации во светот. Во 2017 година Глобалниот индекс за мир (Global Peace Index), ја наведе Словенија како седма најбезбедна земја во светот. Како странски студент во оваа земја ќе ги уживаш истите права со словенечките студенти.

5. Најчиста земја на светот

Обединетите Нации во 2017 година ја прогласија Словенија за најчиста земја на светот.

Титулата „најзелена“ Словенија ја освои поради високото рангирање во сите индикатори за квалитет на воздухот, водата и отпадот, заштита на природата и зелените бизниси. Во 2016 година ЕУ го прогласи главниот град Љубљана за најзелен европски град. Во целата земја има 17 сертифицирани зелени дестинации.

6. Земја на иновации

Словенија спаѓа меѓу најиновативните земји во светот, благодарение на нејзиното огромно вложување за научни истражувања и развој во различни области. Оваа мала земја е во светскиот врв по бројот на изуми, висока технологија, продуктивност, додадена вредност на производството, ефикасност во високото образование (процент на работна сила со диплома).

7. Работи за време на студиите

Словенија е една од ретките земји во светот која им овозможува на студентите да работат до 40 часови неделно. Преку студентската работа државата стимулира стекнување на работно искуство пред дипломирањето и зајакнување на студентскиот буџет.

8. Животни трошоци

Студирањето во Словенија е доста погодно, со оглед на тоа дека македонските државјани имаат право на бесплатно студирање, а за возврат добиваат квалитетно високо образование и меѓународно признаени дипломи. Пред да дојдеш на студии овде треба да ги земеш во предвид трошоците за сместување и храна, кои во споредба со другите европски земји во Словенија се релативно ниски и прифатливи.